喺30年前，我就認識太和邨，見證住佢不同嘅改變。好耐無返過嚟，原來依家太和邨商場變咗好多，餐廳都多咗好多選擇。我哋就揀咗香葉灣，貪佢選擇豐富，有泰式美食、馬來咖哩、中式小炒同西式扒餐等。
西冷牛扒鐵板餐
鐵板餐配有餐湯、餐包同餐飲，特別要讚下佢嘅羅宋湯，材料豐富，湯身微杰，非常好味。至於西冷牛扒揀咗三成熟，食嘅時候可以借助鐵板嘅熱力，變成五成熟。以價論價，牛扒肉質唔錯，夠軟腍唔嚡口，肉味香濃。另外，仲可以揀飯、意粉、薯菜或沙律，我哋就揀咗意粉，估唔到意粉已撈埋茄汁，比白烚意粉更有誠意。
馬拉盞炒通菜
中式小炒方面，就叫咗一個素食選擇，跟埋白飯同餐湯。真心唔覺得呢個係馬拉盞炒通菜，味道更似蝦醬炒通菜，但味道係唔錯嘅，加上鑊氣十足，通菜非常嫩口又入晒味，好惹味。